उजवाड ब्युरो, २० : मुळावे कॅम्प आनी सध्या शाहुनगर हांगा रावपी डॉ. फिलीप वाझ (66) सोमारा सकाळीं देवाधीन जाले. तांचे इंतेर मंगळारा सकाळीं 11 वरांचेर वैभवनगरांतल्या सेंट जोसेफ इगर्जेंतल्यान मिसा उपरांत जातेले. डॉ. वाझ हे सेंट पॉल्सचे माजी शिक्षक आनी कॅथलिक बँकचे माजी चेअरमन सरगेस्त जोसेफ वाझ (मास्टर वाझ) हांचो पूत जावन आसलो. कॅम्पांत ताचो दवाखानो आसा.
उजवाड आतां 24व्या वरसांत पावल मारता ही खूब खोशेची गजाल व्हय. 23 वरसांची खडतर वाटचाल, 125 वयर खेड्यांची- शारांची भ्रमंती, 55 रुपयांची वर्गणी वो पटी घेवंक धडपड आनी उजवाडची ज्योत तेवत दवरचो प्रयत्न, घाटमाथो प्रदेशातल्या कोंकणी मनशाचे अस्तित्वा बद्दल गोय आनी सगळ्या प्रिथुमिक जाणवाय करुन दिवप आनी कोंकणी मनशाचो एकवोट घडोवन हाडून कोंकणी भास आनी संस्कृताय थिगोवन दवरप, अशे बहुरंगी- बहुढंगी आनी इतिहासिक कार्य उजवाड वोरवी साध्य जाला.
