उजवाड ब्युरो : परदेशांत भोंवप हें सगळ्यांचें सपन. पूण व्हिसा- पासपोर्ट आनी अर्थसंकल्पाक लागून जायते जाण परदेशांत वचपाची येवजण रद्द करतात. पूण आतां तुमचें परदेशांत भोंवपाचें सपन बेगीनूच पुराय जातलें. हय, आतां व्हिसा नासतना परदेशांत भोंवपाक मेळटा. थायलंडांत भारतीय नागरिकां खातीर खाशेली ऑफर आसा. आतां भारतीयांक थायलंडाक भेट दिवपाक व्हिसाची गरज पडची ना.
थायलंडान परदेशांत वचपी प्रवाशांचे व्हिसा नेम शिथील केल्यात. तैवान सयत भारतांतल्यान येवपी लोकांक ३० दीस व्हिसा नासतना थायलंडाक भेट दिवंक मेळटा. थाय पर्यटन कंपनीच्या म्हणण्या प्रमाण भारतीय नागरिकांक १० नोव्हेंबर २०२३ ते १० मे २०२४ मेरेन व्हिसा नासतना थायलंडाक भेट दिवंक मेळटा.
थायलंड हें फकत भारताचेंच न्हय तर संवसार भरांतल्या पर्यटकांचेंय आवडीचें पर्यटन थळ. युरोपांतले लोकूय सुटी घालोवपा खातीर हांगा येतात. तशेंच थायलंडांत हिंदू देवळां खूब प्रमाणांत दिसतात. दोनूय देशांनी वांटून घेतिल्ल्या धर्मीक आनी संस्कृतीक परंपरांचो बरोच इतिहास आसा. तशेंच थायलंडांत अयोध्या शार आसा. हांगा भगवान रामाचें देवूळूय बांदलां.
थायलंडांत जायतीं भारतीय देवळां आसात. हाकाच लागून भारतीयांचो थायलंडाचेर मोग आसा. आंकडेवारी प्रमाण आतां मेरेन थायलंडांत मलेशिया, चीन आनी दक्षिण कोरिया उपरांत भारतांतल्यान सगळ्यांत चड पर्यटक आयल्यात. अंदूं भारतांतल्यान १२ लाख पर्यटक थायलंडाक आयल्यात.
