उजवाड ब्युरो, ऑक्टोबर 6: सोरो आमचे भलायकेक कितलो हानिकारक, हें सगळ्यांक खबर आसा. सोऱ्याक लागून कुडीचें खूब लुकसाण जाता. काळीज, लिव्हर, मेंदू ह्या सारक्या जायत्या अवयवांचेर परिणाम जाताच. पूण सोऱ्याक लागून मूत्रपिंडांक चड लुकसाण जाता. मूत्रपिंड हें आमचे खातीर खूब म्हत्वाचें. कुडींतले विखारी पदार्थ मूत्रपिंडां काडून उडयतात.
मूत्रपिंडाच्या कार्याचेर परिणाम
सोरो पियेल्यार मूत्रपिंडांतल्या रगताचो प्रवाह वाडटा. जाका लागून मूत्रपिंडांचेर चड ताण पडटा. अशे स्थितींत मूत्रपिंडांचें कार्य उणें जावं येता. एकदां मूत्रपिंड इबाडल्या उपरांत जायतीं दुयेंसां जावंक शकतात.
मूत्रपिंडांत सुज येवप
चड सोरो पियेल्यार मूत्रपिंडांत सुज येता. हाचे उपरांत मूत्रपिंडांत दुखपाक सुरवात जाता. सोरो पियेवपाचेर नियंत्रण दवरुंक ना जाल्यार मूत्रपिंडाचे लुकसाण जावपाचो धोको चड आसता. जांची दोनूय मूत्रपिंड इबाडल्यांत तांकां जिवीतभर डायलिसीस आदाराची गरज आसता.
देखून मूत्रपिंडाची जतनाय घेवप खूब गरजेचें. सगळ्यांत पयलीं सोरो बंद करचो. ते उपरांत दिसाक उण्यांत उणें ७ ते ८ पेले उदक पियेवचें. ते भायर लिंबाचे उदक, आडसाराचे उदक पियेवचें.
