उ्जवाड ब्युरो, ऑक्टोबर 3 : इंडियन कावन्सील ऑफ मेडिकल रिसर्चाच्या (आयसीएमआर) हालींच्या अभ्यासांत भारतीय वखदाक प्रतिसाद दिना अशें दिसून आयलां. ऍन्टीबायोटिक्स वखदांचो वापर व्हडा प्रमाणांत केल्ल्यान तांची रोग प्रतिकार शक्ती वाडल्या आनी ताका लागून ते हेर वखदांचो वापर करिना. हाचो अर्थ गंभीर दुयेंसांनी सांपडिल्ल्या दुयेंतींचेर वखदांचो अनुकूल परिणाम जायना आनी ताका लागून दुयेंतींचो जीव धोक्यांत सांपडटा. देखून अशा वखदांचो (अँटीबायोटीक्स, अँटीव्हायरल वा अँटीफंगल) गैरवापर मनशां मदीं चड प्रमाणांत आशिल्ल्यान जतनाय घेवप गरजेचें. डॉ. रोमेल टिक्कू (मॅक्स सुपरस्पेशियलिटी हॉस्पिटल) हांणी एका इंग्लीश दिसाळ्या कडेन उलयतना वखदांचो लोकांचे कुडीचेर योग्य परिणाम जावंक नाशिल्ल्याचें कारण आनी वखदांचो गैरवापर वाडोवपाचीं कारणां हांचे विशीं म्हायती दिल्या. ऍन्टीबायोटिक्स वखदांचो सतत वापर केल्यार बॅक्टेरिया घटमूट जातात अशें तांणी सांगलें. कारण बॅक्टेरियाकूच ऍन्टिबायोटीक्स वखदांची संवय जाता आनी तीं घटमूट जातात. देखून बारीक सारीक दुयेंसां खातीर ऍन्टिबायोटीक्स वखदांची गरज नासता.
पयलें कारण म्हणल्यार ऍन्टिबायोटीक्स वखदां सोंपेंपणान मेळटात आनी मात्शें दुयेंत पडल्यार लेगीत बेगीन बरे जावपाचे आशेन वखदां घेवपाची आमची संवय. देखून लोक योग्य उपचार करचे बदला स्वताच्या हातान ऍन्टिबायोटीक्स वखदां घेवपाक वैजकी केंद्रांत वतात. तशेंच, ते चड करून वळखीच्या दोतोराक वखदांचो कोर्स करपाक लायतात आनी दोतोरान न्हयकार दिल्यार ते जाय तें वखद सरळ वचून फार्मासीस्टा कडल्यान विकतें घेतात.
दोतारांच्या म्हणण्या प्रमाण, जायते फावटीं आपल्याक दुयेंतींक जोर, आंग दुखप आनी तकली दुखपाखातीर पॅरासिटामोल घेवपाचो सल्लो दिवचो पडटा. पूण उपरांत तातूंतले जायते जाण आयबुप्रोफेन आनी डायक्लोफेनाक ह्या वखदांचो आदार घेतात. जोर येवपाचें कारण कळना जाल्यार पॅरासिटामोल हें सगळ्यांत सुरक्षीत वखद. पूण ते उपरांत तुमकां खंयचें वखद घेवपाचें आसा तें दोतोराक विचारूं येता. तशेंच पॅरासिटामोल चड प्रमाणांत घेवचें न्हय. कारण-वखदाचो डोस मनशाचे पिरायेचेर आनी कुडीच्या वजनाचेर आदारून आसता.
दुरुपेग जावपी वखदां खंयचीं; लोक आपले मर्जीन घेवपी वखदां:
Azithromycin – जोर, ताळो दुखप, प्रौढ आनी भुरग्यां मदीं खोंकली.
Amoxycillin – सामान्य थंडी, जोर, कान दुखप, ताळो दुखप आनी खोंकली.
Amoxycillin (Clavulanic acid कॉम्बिनेशन) जोर, ताळो दुखप आनी खोंकली.
सिप्रोफ्लोक्सासीन, ऑफलोक्सासीन – मुताच्या मार्गात संसर्ग आनी अतिसार.
Cefixime – जोर, ताळो दुखप आनी खोंकली.
