‘मणिपूरच्या त्या बायलां खातीर उलोवचें.’*
-रवीश कुमार
सगले भारतीय नगरिक आनी वाचक,
मणिपूरचो तो व्हिडियो आमच्यांतल्या जायत्या जाणांनी पळयलो वो ना आसूं येता, जातूंत जायते दादले कांय बायलांक नग्न करून तिची कूड दामतात. दादल्यांची गर्दी नग्न बायलांक धरून व्हरून व्हरता. त्या बायलांच्या कुडी कडेन त्या जमातीचे खूनी हात खेळटात. असहाय्य आनी लाचार बायलो रडटात. दादल्यांची गर्दी मजा घेत आसा। सभ्यतेच्या सामान्य नेमा परमाण
सोशल मिडिया साइट्स बेगीनूच हो व्हिडियो दाखोवप बंद करतले . पूण ही घडणूक ही खरीच आनी वस्त्विक आसा. घडणुकेचो तपशील बरयला तसोच आसा, ह्या व्हिडियो उपरांत त्या बायलांक कितें जालें तें आमकां खबर ना? गर्दी तांकां खंयथावन हाडटाली? खंय व्हरताली? त्या व्हिडियोची सुरवात आनी शेवट ना, फकत मदीं एक ल्हानसो भाग आसा. त्या व्हिडियो कडेन कोणूच दुर्लक्ष करूंक शकना. आनी आयज तुमी आज शांत रावंक शक ना.
आयज आमकां दादल्यांच्या गर्देन भरिल्ल्या त्या निर्वस्त्र बायलां खातीर उलोवचें पडटलें. तुमी खंय आसात थंय उलोवचें. बाजारांत गेल्यार थंयच्या दुकानदारा कडेन उलोवचें. रिक्शा ओडपी मनशा कडेन उलोवचे. ओला उबेर कॅब ड्रायव्हरा कडेन उलोवचें. बापायक फोन केल्यार पयलीं हें सांगात. तुमची इश्टीण तुमकां फोन करता जाल्यार पयलीं हें सांगात. वर्गांत आसल्यार उबे रावून तुमच्या शिक्षका कडेन उलोवचें. खंयच्याय रेस्टॉरंटांत इश्टां वांगडा मजा करतात जाल्यार जेवप बंद करात आनी ह्या बायलां खातीर उलोवचें. बशींत आसूं, गाडयेंत आसूं, विमानतळार आसूं, मणिपूरांत एक व्हिडियो व्हायरल जाला अशें सांगात, तातूंत लोकांनी बायलांक निर्वस्त्र करून तांचे कुडिशी खेळटात. ही घडणूक अशा देशांत घडली, जंय ‘बायलांक देवीभशेन वागयतात आनी हांगा तांची पुजा करतात’.
आयज तुमी ह्या सैतानी गर्दे आड उलयना जाल्यार मागीर त्या बायलांची कूड आनी मन सदांच अडचणींत पडटलें. तुमी उलयनात जाल्यार म्हणल्यार तुमी लेगीत गर्देंत सामील जातात. तुमच्या उतरांनी तुमी बायलांक नग्न करून तांच्या आंगान खेळपी जनावरांच्या जमातींत सामील जातात. म्हणून फोन उखलून सगळ्यांक सांगात की मणिपूरच्या बायलां सांगाता अशें घडलें हें सगळ्यांक सांगात. आमी ताका विरोध करतात आनी आमचीं मान लजेन सकयल देंवता. मणिपूरांत घडिल्ले घडणुके आड उलोवचें. कोण आयकना जाल्यार बंद कुडींतल्या त्या बायलां खातीर एकटेच रडून घेय़ात .
मणिपूरांतल्या त्या बायलांचो असहाय्यताय आनी लाचारी तुमकां पावची ना हें म्हाका खबर आसा, कारण तुमी तांचें रडप आयकुपाक पात्र नात. तुमी वाचतात तीं दिसाळीं, पळयतात तीं चॅनल, तांणी तुमची संवेदनशीलताय मारून उडयल्या. तुमच्यतलें बरेंपण तांणी नश्ट केलां.
त्या बायलांचो आवाज गोदी मिडियाचेर उठतेलो कितें नां, तें कळना. हो दृश्य पळोवन आमचो प्रधानमंत्री रडटलो काय ना तेंवुय कळना? बायलां विकास मंत्री स्मृति इराणी दिखाव्या पासोत रडटली काय ना तें म्हाका खबर ना? पूण ही गर्दी कोणे तयार केली तें म्हाका खबर आसा. कसल्या तरेच्या राजकारणान तो तय़ार केला हेवुय म्हाका खबर आसा. ह्या राजकारणान तुमका एक जनावर केला.गोदी मिडियान तांचे प्रेक्षक आनी वाचक हांका मनीसघाण केल्यात.
जाती, धर्म, भास, प्रदेश ह्या अस्मिताय राजकारणान मनशाक मनीसघाण केला.मणिपूरच्या त्या बायलांक घेरून सर भोंवतणीं नाचपी दादल्यांचोय गर्दी तुमचे लेगीत सरभोंवतणी तयार जाला. सोसायटी मदल्य़ा काका पासून सावधान रावचें. तुमच्या घरांत दीस-रात विख पेरपी नात्यांतल्या लोकां कडेन सावधान रावचें. अस्मिताय आनी दुस्वासाच्या राजकारणान देशांतल्या लोकांक ह्या जमातींत कसो सामील केला तें सगळ्यांक वचून सांगात. त्यो ‘मणिपूर’ बायलो न्हय.. त्यो कुकी बायलो न्हय. त्यो फ़कत बायलो आसात. ही घडणूक तुमकां अस्वस्थ करत नासल्यार , तुमच्या कुडींत कंप निर्माण जाई नासत जाल्यार तर तुमी स्वताक मेल्लो (मृत) म्हुण जाईर करात.
पूण निमाणो स्वास घेवचे पयलीं त्या बायलां खातीर उलोवचें. तें बरोवन दवरचें. कोणाक तरी सांगात हें अशें घडला म्हुण. मणिपूरांत चालू आशिल्ल्या हिंसाचाराक लागून फाटल्या अडेज म्हयन्यांत ह्या देशाच्या प्रधानमंत्रीन शांततायेचो उलो मारूंक ना. थंय वचून दुस्वास आनी हिंसाचार बंद करपाचें आवाहन केले ना. सरकारान आपलें कर्तव्य पाळूंक ना. कित्याक थंय वचून वा अपील केल्यार हिंसाचार थांबतालो हाची तांका खात्री ना.
पूण ह्या मौनाचो वो चुप्पीचो अर्थ कितें? ह्या मौनाचे समर्थन करुंक शकता ?
प्रधानमंत्री ओगी रावूं.
तुमी तुमचें मौन सोडात आनी
उलेयात.
तुमचें, .
रविश कुमार
( मुळावो लेख हिंदी – अणकार : लुईस रॉड्रीग्स
* घटनेत आशिल्ल्य़ा फ़ोटुंतल्या ह्या नराधमाक आनी तेग जाणांक अटक जाल्या.
तांकां फ़ाशी जावंचि अशी मागणी जोर धरुंक लागल्या.
News Views: 516