उजवाड ब्यूरो, बेळगांव: पावसाच्या दिसांनी जायत्या तरांच्या दुयेंसांचो धोको आसता. घाणयाऱ्या उदकांतल्यान आनी वायट अन्न खावन हानीकारक बॅक्टेरिया कुडींत प्रवेश करतात. ताका लागून जायते रोग जातात. ह्या हंगामांत भलायकेची जतनाय घेतली ना जाल्यार फ्लू, व्हायरल जोर, न्युमोनिया, टायफॉयड, बुरशीचें संसर्ग, त्वचेचो दाह, खोंकली ह्या सारक्या समस्यांक सहजपणान बळी पडूं येता. ह्या दुयेंसांचेरूय वेळार उपचार केलो ना जाल्यार जिवाक धोको निर्माण जाता.
अशे परिस्थितींत भलायकेची जतनाय घेवप गरजेचें आसता. कांय टीप्स पाळल्यार तुमी गंभीर दुयेंसां पासून स्वताची राखण करूंक शकतात. ह्या हंगामांत संसर्ग जावचो न्हय म्हूण खंयच्यो पद्दती आपणावंक मेळटात तें पळोवया.
रस्त्यार जेवण खावचें न्हय
ह्या हंगामांतले चडशे दुयेंस चुकीच्या आहाराक लागून जाता, अशें तज्ञ दोतोर सांगतात. ह्या हंगामांत सांठोवन दवरिल्ल्या अन्न पदार्थांक बॅक्टेरियाची लागण जाता. अशें अन्न खाल्ल्यान ते कुडींत भितर सरतात आनी मनशांक रोगाची लागण जाता. देखून ह्या हंगामांत रस्त्या वयलें खाण खावप टाळचें. फकत घरांत शिजयल्लें जेवपाचो यत्न करात.
जोर आयल्यार दोतोराक मेळचें
चडशे व्हायरस संसर्ग जोरांतल्यान सुरू जातात अशें दोतोर सांगतात. अशा वेळार जोर येवन तो दोन दिसां परस चड काळ तिगलो जाल्यार दोतोराचो सल्लो घेवचो. हे परिस्थितींत स्वता वखदां घेवप टाळचें. दिसांतल्यान दोन फावटीं कुडीचें तापमान तपासचें. शंबरां परस चड जोर आसल्यार उपचाराची गरज आसता.
भरपूर न्हीद घेवची
ह्या हंगामांत रोगप्रतिकार शक्ती खातीर पुराय न्हीद गरजेची आसता. रातचे वेळार न्हिदपाचो आनी सकाळीं वेळार जागें जावपाचो यत्न करचो. उण्यांत उणी आठ वरां न्हीद घेवची. रातच्या वेळार चड खावं नाकात. तसो यत्न करचो. कांय दिसांनी संवय जाता. न्हिदेच्या कांय वरां आदीं तुमचो फोन वापरप बंद करात. कठीण गजाल, पूण अशक्य न्हय.
आहाराची जतनाय घेवची
पावसाळ्यांत जेवण- खाणाची जतनाय घेवप म्हत्वाचें. आहारांत प्रथिनां आनी तंतू हांचो आस्पाव करचो. सकाळीं जेवण आनी दनपारां फळां खावं येतात. गोंयकारांक शक्य ना, पूण पावसाच्या दिसांनी शक्य तो शिवराक जेवल्यार बरें. निदान ताजें नुस्तें खावचें.