येर्सा, पदा वरवी कोंकणी भास आनी संस्कृती थिगून रावल्या : आल्फी मंतेरो
मिनीन गोन्सालवीस, उजवाड ब्यूरो, बेळगाव: कक्केरी, ता. खानापूर: हांगासर सांत अंतोनीच्या फेस्ता निमतान घुमटा सर्तीचे येवजन केल्ले. आमची कोंकणी भास आनी संस्कृती थिगोवन दवरप, त्याखातीर उर्बा दिवप आनी नव्या पिळगेनयी कोंकणी भास आनी संस्कृती मुखार व्हरप ह्या खातीर ह्या कार्यावळीचे ऐवजन केल्ले.
हांगाचे पॅरिश प्रिस्ट फादर एडी डिकोस्टा, उजवाडचे संपादकीय सल्लागार, फामाद लेखक, इतिहास संशोधक आनी उद्यमी आल्फी मंतेरो, मिनीन गोन्साल्विस हे मुखेल सोयरे म्हूण हाजीर आशिल्ले. जोसेफ फुर्ताडो हांणी समेस्तांक एवकार दिलो.
ह्या वेळार फा. एडी डिकोस्टा, आल्फी मंतेरो ह्या मानेस्तांचो फुलातुरो आनी शॉल दिवन मानेस्तांच्या हस्तुकी सन्मान जालो. तशेच फ्लोरिन सोज, काकतीना फुर्ताडो, फ्रँकी पायस, सीमा नाझरेथ, ऑस्टिन पायस ह्या गुणवंत विद्यार्थ्यांनी मेळयलेल्या विशेश यशाखातीर मानेस्तांच्या हस्तुकी तांचो सन्मान जालो.
ह्या वेळार मुखेल सोयरे आल्फी मंतेरो हांणी आपल्या उलोवपांत सांगले, घाटमाथ्यावयली पयली शाळा 1910 इसवेंत कक्केरी हांगा सुरू जाली. त्या उपरांत हेर सुवातेर सुरू जाल्यो पूण पयलो मान कक्केरीक फावो जालो. 350 वर्साफाटी गोयांतल्यान येवन हो कोंकणी समाज घाट माथ्यावयल्या 132 वयर गावांत स्थायिक जालो. आपली घरादारा, शेती-भाटा, सगे सोयरे सोडून हो समाज आयलो. जाल्यार तांणी आपलो भावार्थ, कोंकणी आवयभास आनी संस्कृती सोडूंक ना. पयले इरमांव आनी आता आमचे पाद्री माद्री लोकांचो भास आणि संस्कृती थिगोवन दवरपांत शिंवाचो वांटो आसा. येर्सा आनी पदा ही आमची लोकगीत संस्कृती आसा. गोयांत येर्सावयर लोक पी.एचडी. करीत आसात. आता आमची संस्कृती संभाळून दवरपी येर्सा, घुमटां आनी कोंकणी पदा कमी जायत आसात. फकत आळणावर, गोधोळी, कक्केरी, गुंडोळी ह्या भागांतच आमकां ती पळोवंक मेळटात. हांगाचे लोक खरेंच अभिनंदनांक पात्र आसात. आमी सगळ्यांनी आमची आवायभास आनी संस्कृताय संभाळून दवरपाचो प्रयत्न करूया.
ह्या वेळार जाल्ल्या घुमटां सर्तींत आळणावर, गुंडोळी आनी कक्केरी घुमटा पंगडानी वांटो घेतलो. घुमटांच्या तालावयर एकापरस एक सोबीत, मधुर पदा सादर जालीं.
“रोपींन मुजे नांव, रोपीन हिंडता बारा गांव”,
“उलय सोंमया उलय, उत्तर तुजे हांव ऐकता”,
“आमच्या इगर्जेक आमी तांबडो रंगयला, माना कुंजाताक आमी फेस्ताक आपयला”,
“आयल्यांव तुमच्या घरी रे भावाणु बसोंक बसका दिया”,
“तीन सांजेच्या वेळी आंकवारी आयमोरी रजार करी”,
“संता खुर्साचे यावय कुरवेणु, निवार यामुका आता आमुच्या देवा”
ह्या सारकी एका परस एक घुमटां पदा सादर जालीं. लोकांनी अक्षरशा तल्लीन जावन प्रतिसाद दिलो.
सर्तींत कक्केरी पंगडाक पयले, आळणावर पंगडाक दुसरे आनी गुंडोळी पंगडाक तिसरे इनाम फावो जालें. फादर एडी, आल्फी मंतेरो आनी मानेस्तांच्या हस्तुकी इनामा वितरण जालें.
सेबेस्टीयन फुर्ताडो सर हांणी आभाराचे उलोवाप केले.
