गोयांत वचून सोरो पियेवपी लोकांचे प्रमाण वाडले????

गोयांत सोरो विक्रेतल्यान मेळपी महसुलांत 158 कोटींनी वाड
सरकारी तिजोरेंत 649.91 कोटींचो कर जमा
उजवाड ब्युरो, पणजी : गोयांत वचून सोरो पियेवपी लोकांचे प्रमाण वाडले किते असो प्रस्न पडला, कित्याक गोंय सरकाराक सोरो विक्रींतल्यान राज्य सरकाराक मेळपी करात मोट्या प्रमाणांत वाड जाल्या. 2019-20 चे तुळेंत 2021-22 त हो कर 158 कोटींनी वाडिल्ल्याचे अबकारी विभागांतल्या सुत्रांनी दिल्ले आंकडेवारींतल्यान मुखार आयला.
2019-20 त सोरो विक्रींतल्यान राज्याक 491.84 कोटींचो महसूल मेळिल्लो. 2020-21 त तातूंत 23 कोटींची वाड जावन हो आंकडो 514.91 कोटी जाला. जाल्यार 2021-22 त तातूंत वट्ट 135 कोटींची वाड जावन अंदू राज्याचे तिजोरेंत 649.91 कोटींचो महसूल जमा जाल्ल्याचे आकडेवारींतल्यान दिसून येता.
2020 त राज्यांत कोरोना म्हामारीचो उद्रेक जाल्लो. ताका लागून पर्यटकांची संख्या मोट्या प्रमाणांत उणी जाल्ली.
114 सुपरमार्केटांक सोरो विक्रीचे परवाने
राज्यांतल्या 114 सुपरमार्केटांक अबकारी खात्यान सोरो विक्रीचे परवाने दिल्यात. सुपरमार्केटांत स्वतंत्र सुवात तयार करून सोरो विक्री करपाची अट घातल्या. ताका लागून सुमार सगलींच सुपरमार्केटां ह्या अटीक पाळो दिवन सोरो विक्री करतात, अशी म्हायती अबकारी विभागांतल्या सुत्रांनी दिली.
ह्या काळांत सरकाराक सोरो विक्रींतल्यान अपेक्षीत महसूल मेळूंक नाशिल्लो. पूण कोरोना म्हामारी उपरांत परतून वेव्हार सुरळीत जाल्ल्यान ह्या महसुलांत वाड जावपाक लागल्या, अशी म्हायती अबकारी विभागांतल्या एका अधिकाऱ्यान प्रसार माध्यमां कडेन उलयतना दिली.