उजावाड ब्यूरो, पुणेः दिल्ली सरकाराच्या बाल हक्क संरक्षण आयोगान ‘बाल चॅम्पियन पुरस्कार’ खातीर पुण्य़ाच्या संतुलन संस्थेची निवड केल्या. फाल्यां 25 मार्च 2023 दिसा कला संगम, मंडी हाऊस, दिल्ली हांगा सर्वोच्च न्यायालयाचे न्यायाधीश पी. एस. नरसिंह आनी ओरिसा उच्च न्यायालयाचे मुखेल न्यायाधीश डॉ. मुरलीधर हे पुरस्कार दितले. रु. ७५,०००, प्रमाण्पत्र आनी स्मृतीचिन्न अशा स्वरुपाचो हो पुरस्कार आसा। एड.पल्लवी आनी एड.बस्तु रेगे हांचे ह्या पासोत सगळेकडेन अभिनंदन जाता.
शिक्षणा पासुन वंचित, भुरगीं , मजुरी करपी भुरगी, निराधार, वंचित, फातर खणींत काम करपी चले आनी चलयो हांचे खातीर फातराच्या खणीच्या वाठारांतल्या वाघोली, पुणे हांगा १९९७ वर्सा संतुलन संस्थेन पयली अभिनव पाषाण शाळा सुरू केली. पिळग्यांन पिळग्यो शिक्षणांतल्यान वंचित आशिल्ल्या समाजीक आनी अर्थीक नदरेन दुबळ्या वर्गांतल्या भुरग्यांक हे संस्थेन शिक्षणाचीं दारां उक्तीं केलीं. शिक्षणीक हक्क कायदो अस्तित्वांत येवचे पयलीं बालवाडी ते धाव्या वर्गांतल्या वंचित वर्गांतल्या भुरग्यांक फुकट शिक्षण, पोशण, भलायकी सुविधा, व्यक्तीमत्व उदरगत आनी निवासी शिक्षण दिवपाची वेवस्था केल्या आनी राज्यांतल्या 40 हजारां परस चड भुरग्यांक शिक्षण दिलां. तेच भाशेन संतुलनच्या अथक कार्यवोरवीं मजुरांमदीं साक्षरता आनी कुशळटाय वाडपावांगडाच शिक्षणाची पातळी वाडल्या, ताका लागून स्थलांतरीत आनी भटक्या मजुरांचो शोशण आनी गरिबी उणी जाल्या.
वंचित स्थलांतरीत फातर खणकाम करपी, शेतकी मजूर, ल्हान जमनीधारक, शारांतले गरीब, आदिवासी, शेतकार तशेंच बायलांचें प्रबोधन, संघटना आनी सशक्तीकरण, तरणाट्यांची संघटना आनी कुशळटाय उदरगत हांच्या हक्कां खातीर सृजनशीलपणान झुजपी एक समतोल चळवळ संतुलन वोर्वीं उभी जाल्या. , महाराष्ट्र, उत्तर प्रदेश, उत्तराखंड हांगाच्या लाखांनी कुटुंबांनी असंघटीत कामगारांच्या मुळाव्या हक्कां खातीर चळवळींत वांटो घेतला. पुरस्काराचो स्वीकार एड बस्तू रेगे करतलें
