मुंबय : कळंबोली, नवी मुंबय हांगाची नामणेची सामाजिक वावराडी मोनिका पीटर डान्टस हिका राश्ट्रीय सुवर्णरत्न जिवीतगौरव पुरस्कार मेळ्ळो. कोव्हीड काळांत आनी त्या उपरांत मॉनिकाबाय हाणीं समाजांतल्या कितलेशाच गोरगरीब, गरजेवंत हांचे पासोत सढळ हातान मजत करून तांच्या संवसाराक आनी तांच्या भुरग्यांच्या शिक्षणाक हातभार लायला. जायत्या विधवा बायलांक लेगीत ताणीं तांचो संवसार सावरूंक मजत केल्या, तर गरजेवंतांक गरजेच्यो वस्तु दिवन तांच्या मुखामळाचेर हासु हाडपाचो प्रामाणिक यत्न केला.
29 ऑक्टोबर, 2022 दिसा नामणेचे मराठी गायक अजीत कडकडे हांचे हस्तुकी ठाण्याच्या डॉ. काशिनाथ घाणेकर नाट्यघरांत येवजिल्ल्या सुवाळ्यांत हो पुरस्कार आनी कार्यभुषण मानपत्र मोनिकाबाय हांका फावो जाले. ह्या वेळार आंतरराष्ट्रीय टेबल टेनीस प्रशिक्षक मा. जयंत करडे, शिक्षण महर्षीं डॉ. राज परब ठाणे आनी मानेस्त हाजीर आशिल्ले.
