उजवाड ब्यूरो : सप्टेंबर १९ : घाटमाथो प्रदेशांतल्यान मुंबय राबितो केल्ल्या आनी गोंयमूळांतल्या कोंकणी भाशीक लोकांची संघटना आशिल्ल्या रोझरी क्रिस्त सभेन आयतारा आपलो 10वो वर्धापन दीस मनयलो. घाटमाथो प्रदेश आनी सिंधुदुर्ग जिल्लो तेच भाशेन गोंयांतल्या वेगवेगळ्या समाजांचे गांवकार आशिल्ल्या भोवसंख्य वांगड्यांनी एकमेकाकडेन आपले संबंद घटमूट करपाचो आनी आपापल्या कम्युनिदादींचेर आपलो हक्क परतून दाखोवपाचो निश्र्चय केलो.
माहिम मुंबयच्या कनोसा हायस्कुलाच्या सभाघरांत आयतारा ही दीसभराची कार्यावळ जाली. मुंबयच्या आर्चडायोसीसचे इस्टेट आनी प्रॉपर्टी संचालक फादर रिचर्ड क्रास्टो मुखेल सोयरे म्हुण तर खानापूरचे वरिश्ठ जेजुईत पाद्री फादर मॅथ्यू बार्देसकर मानाचे सोयरे आशिल्ले. फादर मॅथ्यू बार्देसकार हांणी कोंकणींतल्यान मीसान कर्य़ावळीक सुरवात जाली. फादर रिचर्ड क्रास्टो हांणी तेच भाशेन सगळ्या सभासदांनी मिसांत वांटो घेतलो .
समाजांतल्या सबंद लोकांचो एकवट बळिश्ट करुन वेगवेगळे समाजोपयोगी उपक्र्म राबयचे आनी हेर थाराव संमत जाले तातूंत वांगड्यांनी एकमतान थारायलें की एक खाशेली समिती आसची जी जोण आनी कम्युनिदादींच्या प्रस्नांचेर लक्ष केंद्रीत करतली.
“आमची आवय रुजायरी सायबीण आनी आमची आवयभास हांणी आमकां कुडीन आनी आत्म्यान एकवटान दवरला. अवर लेडी ऑफ रोझरीच्या नांवार आमी जेन्ना एकठांय येतात तशें आमचो भावार्थ घटमूट करुंया आनी साांगाता समाजाच्या बऱ्यापणा खातीर एकवटन रावया,” फादर मॅथ्यून कोंकणींत आपल्या प्रवचनांत सांगलें.
उपरांत जालेल्य़ा मेळाव्यांत गोंय मूळच्या नामनेच्या आनी यशस्वी व्यक्तींची तोखणाय जाली. नामनेचो समाजीक वावुरपी निकोलस आल्मेदा, कार्यकारी अभियंतो (पीडब्ल्यूडी) काजमील बार्देस्करचो , बेळगांवाची आदली उपमहापौर मीना रायमन वाझ आनी सिस्टर देवदिता बुथेलो हांचो सत्कार आनी भोवमान जालो. तशेंच फ्रॅटर्नल द आल्दोना कम्युनिदादीचे वांगडी गॅब्रिएल डिसोझा आनी पॉल डिसोझा हांचोय भोवमान केलो. शिक्षणीक मळार उत्कृश्ट कामगिरी केल्ल्या विद्यार्थ्यांक खाशेले इनाम वांटले.
अध्यक्ष काजमील गोवेस, सचीव वाल्नेस रेगो, कोषाध्यक्ष जेरोम फर्नांडीस, समिती वांगडी डॉ डे विड आल्वारीस, सांता आंद्रे, जॉर्ज मॉन्टेरो, मॅथ्यू फर्नांडीस, डॉ मॅथ्यू लोबो, पास्कोल लोबो, मोनिका डांटास आनी हेरांनी ह्या गेट टुगेरच्या यशा खातीर वावर केलो. ह्या संदर्भार कोंकणी नेमाळ्याचो रोसारिचो उग्दासाचो कोंकणी वर्सुकी अंकूय उजवाडाक आयिल्लो.
ह्या वेळार रोझरीचो उगडास ह्या स्मरणिकेचे उक्तावण जाले.