उजवाड ब्युरो: मंजुनाथ शेट हिंदु हाईस्कूल कारवार हाका कोंकणी तीसरी भास कर्नाटकांत SSLC examination गरिष्ठ अंक जोडिल्याक उषा राणे कुटुंबांचें 5000 रू विद्यार्थि वेतन पुरस्कार आनी मंगळूरच्या नलंदा आंग्ल माध्यम शाळेच्या विनीत के हाका कस्तुरी पै कुटबांचो 5000 रू विद्यार्थिवेतन पुरस्कार लाभल्यात.
उजवाड आतां 24व्या वरसांत पावल मारता ही खूब खोशेची गजाल व्हय. 23 वरसांची खडतर वाटचाल, 125 वयर खेड्यांची- शारांची भ्रमंती, 55 रुपयांची वर्गणी वो पटी घेवंक धडपड आनी उजवाडची ज्योत तेवत दवरचो प्रयत्न, घाटमाथो प्रदेशातल्या कोंकणी मनशाचे अस्तित्वा बद्दल गोय आनी सगळ्या प्रिथुमिक जाणवाय करुन दिवप आनी कोंकणी मनशाचो एकवोट घडोवन हाडून कोंकणी भास आनी संस्कृताय थिगोवन दवरप, अशे बहुरंगी- बहुढंगी आनी इतिहासिक कार्य उजवाड वोरवी साध्य जाला.
