उजवाड ब्युरो, मालवण: 14 आनी 15 मे दिसा अ.भा.कों. परिशदेचे 32 वे संमेलन मालवण हांगा जाले. ह्या परिशदेंत घाटमाथ्यावयल्या कोंकणी प्रजेचो बुलंद आवाज दुमदुमलो म्हळ्यार अतिताय जावंची ना.
पयले दिसा माचीवयल्या मानेस्तांक उजवाडचो मालवण विशेशांक भेट दिवन घाटमाथ्यावयल्या कोंकणी भाशेच्या उदरगतीखातीर गोंय सरकारान आनी परिशदेन तेंको दिवंचो अशी मागणी उजवाड परिवार आनी समेस्त घाटमाथ्यावयल्या कोंकणी प्रजेवोरवी केली. सगळे भोवमानेस्त गोंयचे मु्ख्यमंत्री डॉ.प्रमोद सावंत , सांस्कृतिक मंत्री गोविंद गावडे, मालवणचे आमदार वैभव नायक, अध्यक्ष अरुण उभयकार, ज्ञानपीठ जैतीवंत दामोदर मावजो, येवकार समिती अध्यक्ष रोझारियो पिंटो, अ.भा.कों. परिशदेचे अध्यक्ष उषा राणे हांका अंक आनी निवेदन दिले.
दुसरे दीस घाटमाथो प्रदेशांत कोंकणी भास आनी संस्कृतायेचे संवर्धन ह्या परिसंवादाक अध्यक्ष लुईस रॉड्रिग्स हाणी घणाघाती सुरवात केली. म्हज्या धेनांत, मनांत सपनांत दिसता.
सांफ्रा शावेराची मुरती…
हे कांतार म्हणून सांत फ्रान्सिस शावेराक गोंयच्या सायबाक वंदन करुन तांणी प्रास्ताविक केले. हो आमचो परिसंवाद म्हळ्यार घाटमाथ्यावयल्या लाखांनी कोंकणी प्रजेचो आवाज अशें ताणीं म्हळें,
मिनीन गोन्साल्वीस हांणी आपल्या उलोवपांत घाटमाथ्यावयल्या प्रजेचो 300 ते 400 वर्सा फाटी गोंयाथावन स्थलांतर जाल्ल्याथावनचो इतिहास हांगाच्या कोंकणी प्रजेचे गोंयाकडे आशिल्ले संबंध, हांगा येवन तांणी कितले त्रास सोसले, ते हांगाच्या हेर भाशिकांवांगडा कशें एकरुप जाले, तांणी हांगा खंयची व्हड व्हड कामा केली, हांगाच्या सांस्कृतिक, सामाजिक, शिक्षणीक, राजकीय मळाचेर तांणी कशें यश मेळयले तरी असताना आपली भास आनी संस्कृताय कशी सांबाळून दवरली, ह्याबद्दल सविस्तर सांगले.
रिटा बाय रॉड्रिग्स हांणी घाटमाथ्यावयल्या कोंकणी बायलांचे कोंकणी भास आनी संस्कृताय थिगोवन दवरच्याक लाभिल्ले योगदानाबद्दल सांगले. आवयच खऱ्या अर्थान आपल्या भुरग्यांक आवयभास शिकयता. घाटमाथ्यावयली स्त्री ही मायाळू, कश्टाळू, सोशिक आसा. इगर्जींतल्या कांतारावोरवी, येर्सा आनी लोकगीतांवोरवी तिणें फाटल्या 400 वर्सासावन घाटमाथ्यार कोंकणी भास आनी संस्कृताय थिगोवन दवरल्या दादल्यांच्या खांद्याक खांदो लावन कोंकणीखातीरचे तिचे योगदान आमी विसरुंक शकना, अशे तिणे सांगले.
श्री. डिकुन्हा हांणी आपल्या वेगळ्या कोंकणी शैलींत उलोवप केले आनी कर्नाटकांतल्या हेर वाठारांनी कोंकणी उलोवपी लोकांबद्दल सांगले.
अध्यक्षीय भाशनांत लुईस हांणी सगळ्या मुद्यांबद्दल विस्तारान सांगले. खरी कोंकणी भास आनी संस्कृताय घाटमाथ्यावयल्या 300 ते 400 चौखण प्रदेशांत पसरिल्या क्रिस्तांव, दैवज्ञ, सारस्वत, कोकण, मराठा लोकांनी 3 ते 4 शेकड्यांमेरेन सांबाळल्या. जल्म ते मरणामेरेन कोंकणी भाशेशींच तांचो संबंध येता. गोंय सरकारान घाटमाथ्यावयल्या कोंकणी भाशेच्या अभिवृध्दीखातीर सगळ्या तरेन मदत करुंक जाय, अशें सांगोन फ्रान्सिस शावेराच्या आनी एका कांतारावोरवी समारोप केलो.
रिटा रॉड्रिग्स हांणी ह्यावेळार कांय येर्सा गाऊन सादर केली.
*आमगेर काजार म्हूण कार्मेलिन
चिंतूक नसलें आमी
चिंतुलेले तांणी कार्मेलीन
घरच्या आल्मांनी*
हे लोकगीत रसिकांक खुबच भावले. ज्ञानपीठ जैतिवंत कोंकणी साहित्यिक दामोदर मावजो सहित सगळ्या प्रेक्षकांनी टाळयो वाजोवन तांका साथ दिली.
परिसंवादाउपरांत कितल्याशाच साहित्यीकांनी घाटमाथ्यावयल्या या साहित्यीकांक मेळोन शाबासकी दिली. घाटमाथ्यावयल्या कोंकणी लोकांचो खरो इतिहास आता आमकां कळलो, तुम्हीच खऱ्या अर्थान खरे कोंकणी आसात, अशी मता जाय त्या जाणांनी उक्तायली. हांगाच्या कोंकणी मनशाची दखल गोंय सरकाराक आनी कोंकणी संघटनांकी घेवंचीच पडतली, अशी प्रतिक्रिया साहित्यीक उक्तायताले.
