उजवाड ब्युरो, डिसेंबर 28: कर्नाटकांत मंगळार ता.28 डिसेंबर थावन रातीचे 10 ते सकाळी 5 मेरेन नाईट कर्फ्यु लागु केल्या. ओमिक्रॉन प्रकाराचो जोरांत जावंचो प्रचार धेनांत दवरुन 10 दिसाखातीर हो कर्फ्यु लागु केला. भलायकी आनी कुटूंब कल्याण मंत्री के.सुधाकर हांणी सांगले की, हॉटेलांत फकत 50 टक्के ग्राहकांना परवानगी आसतली. पब आनी रेस्टॉरंटाक लेगित हो नियम लागु आसा. तथापि सार्वजनिक येरादारी सेवा आनी वस्तुंच्या वाहतुकीवयर खंयचेई निर्बंध आसचे नात. उद्योग आनी कंपन्यांच्या कर्मचाऱ्यांक, दुयेंतींक आनी तांच्या वांगड्यांक आपतकालीन गरज म्हूण परवानगी मेळतली. मार्गदर्शक नियमानुसार बस, ट्रेन, मेट्रो आनी विमान प्रवासाक परवानगी रावतली. 28 डिसेंबराथावन जावपी लग्न, सभा, परिशद, ह्यासारख्या मेळाव्यांक 300 लोकांची मर्यादा रावतली.
News Views: 783