उजवाड ब्युरो, बेळगांव: क्रिस्तावांच्या प्रार्थना सभांचेर बेळगांवच्या पोलिसांनी बंदी घाल्या, अशा तरेच्यो बातम्यो माध्यमांनी प्रसारित जालेल्यो पळोवन बिशप डॉ. डेरीक फर्नांडिस हांणी खंत उक्तायली. आयज बुधवार ता.24 दिसा बिशप डेरीक फर्नांडिस हांच्या नेतृत्वाखाल एका शिष्टमंडळान पोलिस आयुक्त डॉ.के. त्यागराजन हांका निवेदन दिले.
क्रिस्तांवांक हॉल आनी खाजगी थळांचेर कायदेशीर मार्गान प्रार्थना सेवा करच्याक पोलिसांनी बंदी करची न्हंय, अशें बिशप डेरीक फर्नांडिस हांणी पोलिस आयुक्त डॉ.के. त्यागराजन हांका सांगलें.
ह्यावेळार पोलिस आयुक्त डॉ. त्यागराजन हांणी सांगले की, पोलिसांकडच्यान असो खंयचोच आदेश दिवंक नां. पोलिसांनी क्रिस्ताव धर्माच्यो परंपरा, चालीरीती आनी विधीनुसार केल्ल्या प्रार्थनासेवेच्या आनी क्रिस्तांवांच्या सुरक्षेखातीर आवश्यक उपाय योजना पोलिस करतलें.
निवेदन दिल्या उपरांत पोलिस आयुक्त डॉ.त्यागराजन हांणी क्रिस्तांवांच्या सुरक्षेबाबतींत दिल्ल्या आश्वासनाखातीर बिशप फर्नांडिस हांणी कृतज्ञता व्यक्त केली.पोलिसांनी लादिल्ल्या कथित प्रतिबंधाक लागोन शारांतल्या क्रिस्तावांत गैरसमज आनी संभ्रम आसलो. भारतीय राजघटनेच्या अधिकार आनी चौकटींत रावन प्रार्थना जायीत असताना पोलिसांनी क्रिस्तावांच्या सुरक्षेची चतराय घेवंक जाय, अशें ह्यावेळार बिशप फर्नांडिस हांणी सांगले.
हेर धर्मापरमाणेच क्रिस्तांव लेगित धार्मिक विधी आनी परंपरेपरमान आपल्या घरा आनी हेर सुवातेर प्रार्थना सभा आयोजित करतात. बऱ्याच फावटी क्रिस्तावांक भाड्याच्या हॉलांत अथवा खाजगी सुवातेर प्रार्थना करची पडटा. शिवाय नातलां दिसानी क्रिस्तांव लोकांक सार्वजनिक सुवातेवयर कार्यावळी करच्यो पडटल्यो. ह्याखातीर आमकां पोलिसांनी सहकार्य करचें अशें लेगित बिशप फर्नांडिस हांणी निवेदनात म्हळां.
शिश्टमंडळात बिशप डॉ. डेरीक फर्नांडिस, रेव्ह.नंदकुमार, फा.फिलीप कुट्टी,फा.नेल्सन पिंटो, लुईस रॉड्रिग्स, क्लारा फर्नांडिस आनी फा.प्रमोद कुमार हांचो आस्पाव आसलो.
