चंडाळांचो धुडगूस, कुरसाची मोडतोड ,पोलिसांचो तपास आनी रामघाट खुरसाचो संक्षीप्त इतिहास :

१. कुरसाची-कपेलाची केल्ली मोडतोड. २. आदलो कुरीस. ३. रामघाटची पायवाट ४. इतिहासिक भांय ५. इतिहासिक तलाव. ६. कुरसालागथावन दिश्टी पडपी तिलारी न्हय, कोकण आनी गोंय भूमीचे विहंगम द्रुश्य

लुईस रॉड्रीग्स, उजवाड ब्युरो: १७ नोव्हेंबर दिसा कांय जात्यांध चांडाळ आनी नीच प्रवृत्तीच्या नराधमांनी पाटणे (ता: चंदगड) हांगाथावन १२ कि.मी. चेर आशिल्ल्या रामाघाटच्या इतिहासिक खुरसाची आनी कपेलाची मोडतोड आनी विध्वंस केलो. ही खबर आमी तुमकां रोकडीच कळयली आनी सबंद भावर्त्यांमदें संताप उसळ्ळो.  उजवाडाक मेळिल्ल्या म्हायती परमाणे कांय दुश्ट प्रवृत्तीच्या एका पंगडान हे दुश्कृत्य केले आसल्याचो संशय थळाव्या लोकांनी उक्तायिल्लो. ही घटना घडल्याचे राती म्हळ्यार बुधावार राती सिंधुदुर्ग पोलिसांचे एक पथक थंय पावल्याचे कळता. ह्याच दरम्यान भेडशी-मुळस परिसर आनी पाटणे गांवच्या भावार्त्यांनी दोडामार्ग पोलीसांत तक्रार दाखल केली.

ह्या घटनेचे फुडें कितें जाले अशी आमका विचारणा जावंक लागल्या. ह्या पासोत ही म्हायती तुमचेमेरेन पावयतेलो आमचो हो प्रयत्न आसा.

सिंधुदुर्गातल्या तेरवण-गवळीवाडो ह्या गावांशेजाराक इतिहासिक रामघाट रोड शेजाराक  ‘रामघाटचो खुरीस’ ह्या नावान फामाद आशिल्ल्या इतिहासिक क्रॉसची आणि चॅपलची तोडफोड जाली आनी सिंधुदुर्ग आणि बेळगावच्या भावार्त्यांमदें संतापाचे आनी चिंतेचे वातावरण पसरले. फाटल्या चार वर्सांत ह्या खुरसाची तोडफोड करपा ही दुसरी वेळ आसा.

सिंधुदुर्ग आणि बेळगाव डायोसिजींच्या शीमेर लागून आसलेल्या दुर्गम अशा ठिकाणाचेर हो खुरीस आसा. पूण भौगोलिक दिश्टीन हो खुरीस सिंधुदुर्ग दियोसिजींत आसा. 

खुरसाचो संक्षीप्त इतिहास : बेळगाव थावन सादारण 46 किमी अंतरार तिलारी घाट परिसरांत बेळगांव-वेंगुर्ला रोडथावन पाटणे फाट्याथावन सादारण २४ कि.मी. अंतराचेर दक्षीणेकडेन  हो इतिहसिक कुरीस आसा. हांगाथावन तिलारी न्हय आनी धरणाच्या बेकवॉटरचे तशेच गोंय भुमीचे विहंगम देखावो पळोवन मनशाचे भान हरपून वयता आनी गोंयांत वचपाची इत्सा अनावर जाता.

थळाव्या लोकांच्या सांगण्या परमाणे पुर्तुगीज काळात सिंधुदुर्ग जिल्ह्यातल्या भेडशी आणि कोल्हापूर जिल्ह्यातील चंदगड तालुक्यातल्या आनी घाटमाथो प्रदेशांतल्या गोंया वेपार उद्दिमा खातीर वचपी भावार्त्यांनी ह्या कुरसाची उभारणी ३०० वयर वर्सां आदी केल्ली.

चंदगड तालुक्यांतल्यान कोकणांत देवचे उद्देशान छत्रपती शिवाजी महराजांच्या सैनिकांनी हांगा एक ’शॉर्टकट’ घाटरस्तो तयार केल्लो. फातरांनी तयार केल्लो हो  रस्तो अजून लेगीत अस्तित्वात आसा. दरवर्सा पादयात्रे वोरवीं गोंया वचपी चंदगड- आजरा परिसरांतले पादयात्री अजून लेगीत ह्या मार्गान वयतात. कुरसाथावन सादारन ५०० फुटाचेर एक राम मंदीर लेगीत आसा, म्हणून ह्या रस्त्याक रामघाट रस्तो अशें नाव दवरिल्ले. तेच भाशेन घोड्यांक उदक पाजोवंक शिवाजी महाराजांच्या सैनिकांनी एक तलाव लेगीत निर्मिल्लो आनी सैनिकांक उदक पियेवंक एक भांय लेगीत खोदिल्ली. तलाव आनी भांय अजून लेगीत जशेच्या तशें अस्तित्वात आसात. आदल्या काळांत गोंया वचपी आनी गोंयाथावन परत येवपी भावार्ती हांगा दनपारचो वो रातीचो विशेव घेवन मुखार सरताले अशें थळाव्या लोकांनी सांगले.तेच भाशेन दर सोमार दिसा हांगा शेजारा आसलेल्या गवळी वाड्य़ावयले धनगर हांगा नेमन वाती लायतात अशीय म्हायती मेळली.

कांय वर्सा आदी एका राजकीय नेत्याच्या समर्थकानी मुळावो कुरीस तोडून उडयिल्लो, पूण परते भगसणे मागून ताणी नवो कुरीस उभारिल्लो. पुण लोकांनी जाप विचारतकुच थंयसर कुरीस उभरुन दिलो.

चंडाळांचो धुडगूस, कुरसाची मोडतोड आनी पोलिसांचो तपास :

“बुधवारा (ता: १७ दिसा) म्हाका एका स्थानिकाकडल्यान ह्या घटनेची म्हयती दिवपी फोन आयलो. कांय लोकांवांगडा हांवे घटनास्थळाकड्ने धाव घेतली आनी जाल्लो विध्वंस पळयलो. घटनास्थळाचेर सोर्याच्यो फुटलेल्या बाटल्यो आनी मोडलेल्या फर्निचरचो खच पळोवंक मेळलो. हांवे भेडशी गावातल्या लोकांक माहिती दिली आनी बिशप डेरेक फर्नांडिस हांकाय कळयले. बिरेस्तारा आमी दोडामार्ग पोलिस स्टेशनात एफआयआर दाखल केली . दोडामार्ग इन्स्पेक्टर रिझवाना नदाफ हिणे घटनास्थळाचेर भेट दिवन पंचनामो केला,’’ अशे पाटणे रोझरी चर्चचे पॅरीश प्रीश्ट फादर संतोश लोपेझ हाणीं सांगले.

भेडशी, मुळस, साटेली, पाटणे आणि चंदगड तालुक्यातल्या कॅथलिकांनी लेगीत भेट दिवन हांगा रजार भेटयले.

ह्या बाबतीत संपर्क केलो आसता सिंधुदुर्गचे पोलीस अधिक्षक राजेंद्र दाभाडे हाणी सदर प्रकरणाची गंभीर दखल घेवन तपास सुरु आसल्याचे सांगले. “एफआयआर केल्या आनी आमी ह्या प्रकरणाचा प्राधान्याने तपास करत आसात.   आजूबाजूच्या गावांमदे लेगीत चौकशी आनी तपास सुरु आसा. आमका यश मेळतले आनी गुन्यावगारांक आमी सोदून काड्टले असो आमकां विश्वास आसा, ’’ अशे दाभाडे हाणीं उजवाडाक सांगले.

तुर्ताक भावार्त्यांनी ह्या प्रार्थना स्थळाकडेन रजार करून ताका ताळो लावून ते बंद केला अशी म्हायती फादर लोपेझ हाणी दिली.

गुन्यावगाराक रोकडेच अटक करून तांकां योग्य ख्यास्त दिवची आनी पोलीस- प्रशासनाचेर आशिल्लो लोकांचो विश्वास प्रस्थापीत जावंचो अशी आशा सबंद भावार्त्यांनी उक्तायल्या.

( माहिती स्ंदर्भ : स्ंतान डिसोझा, चंदगड; भेडशी, मुळस भावार्ती )