46 टक्के लोक सरकाराचे कामगिरीचेर समाधानी
प्रुडंट मिडिया सर्वे
पणजी : गोंयांत विधानसभा वेंचणुकेक आतां फक्त तीन म्हयने उरल्यात.राजकी घडणुको नेटान सुरू आसात. हे फांटभुयेर प्रुडंट मिडियान ‘मूड ऑफ द स्टेट’ म्हणल्यार लोकांचो कल जाणून घेवपी सर्वे केला. सरकाराचे कामगिरीचेर गोंयांतले 46.9 टक्के लोक समाधानी आसले तरी 64 टक्के लोकांक सरकारांत बदल जाय.
64 टक्के लोकांक जाय बदल : सद्याचे घडयेक 64 टक्के लोकांक सरकारांत बदल जाय अशें दिसता. 35 टक्के लोकांचो कल सरकारांत बदल नाका असो आसा. एक टक्के लोकांनी अजून कसलोच निर्णय घेवंक ना. दरेक म्हाल तशेंच सगल्या मतदारसंघांतल्या लोकांची मतां जाणून घेवन हो सर्वे जाला.
46.9 टक्के लोक कामगिरीचेर समाधानी : 46.9 टक्के लोकांक सरकाराची कामगिरी बरी आसा अशें दिसता जाल्यार 13.1 लोकांक सरकाराची कामगिरी उत्कृश्ट आसा अशें दिसता. सरकाराची कामगिरी पेड्डेर आसा अशें 29.1 टक्के लोकांक दिसता. सरकाराची कामगिरी सामकी पेड्डेर आसा अशें 10.4 टक्के लोकांक दिसता. 0.4 टक्के लोकांनी सरकाराच्या कामगिरी विशीं मत उक्तावंक ना.
डॉ. प्रमोद सावंत परतून मुख्यमंत्री : डॉ. प्रमोद सावंत हेच वेंचणुके उपरांत मुख्यमंत्री जातले अशें 25 टक्के लोकांक दिसता. दिगंबर कामत मुख्यमंत्री जातले अशें 18 टक्क्यांक जाल्यार रिव्हाेल्युशनरी गोवन्साचे मुखेली मनोज परब मुख्यमंत्री जातले अशें 12 टक्के लोकांक दिसता. हाचे फाटोफाट प्रतापसिंह राणे, विश्वजीत राणे, लुईझीन फालेरो हांचो नंबर लागता.