गोंय : रस्त्यां वयल्या फोंडकुलांक लागून लोकांक सुमारा भायर त्रास सोंसचे पडटात ही गजाल खरी. पूण 1 नोव्हेंबर मेरेन गोंयांतले सगले रस्ते फोंडकूल मुक्त जातले अशें उतर मुख्यमंत्री डॉ. प्रमोद सावंत हांणी काल (आयतारा) जाहीर कार्यावळींत दिलें. भौशीक बांदकाम खात्याच्या संबंदीत अभियंत्यांक सगलीं फोंडकुलां पुरोवपाची सुचोवणी दिल्या. 1 नोव्हेंबरा उपरांत एक जरी फोंडकूल दिसलें जाल्यार संबंदीत अभियंत्याक खर ख्यास्त करतले अशी शिटकावणीय तांणी दिली.
कुंकळ्ळे एज्युकेशन सोसायटीच्या सभाघरांत काल जाल्ले ‘सरकार तुमच्या दारांत’ कार्यावळींत मुख्यमंत्री डॉ. प्रमोद सावंत उलयताले. ह्या वेळार उदकास्रोत मंत्री फिलीप नेरी रॉड्रिगीस, आमदार क्लाफासियो डायस, दक्षीण गोंय जिल्होधिकारी रुचिका कटीयार बी मानेस्त माचयेर हाजीर आशिल्ले.
