गोंय विधानसभा निवडणूक लडयत् आशिल्ल्या 80 उमेदवारांचेर गुन्याव नोंद

उजवाड ब्युरो, फ़ेब्रुवारी 5 :  गोंय विधानसभा निवडणूक लडयत् आशिल्ल्या 301 पैकी 80 उमेदवारांचेर (26.57 टक्के) गुन्याव नोंद जाल्यात. हातुंतल्या 29 जणांचेर आरोप निश्चित जाल्यात तर दोगांक न्यायालयान ख्यास्त लेगीत लायल्या. निवडणुकी पासोत् सर्व पक्षीय तसेच अपक्ष उमेदवारांनी निवडणूक आयोगाक सादर केलेल्या प्रतिज्ञापत्रातल्यान ही माहिती सामकार आयल्या.
2017 त जालेल्या निवडणुकीत 251 उमेदवार उतरिल्ले, तातुंतल्या 39  उमेदवारांचेर गून्याव नोंद जाल्ले. ह्या वेळार मात गुन्यावगारी पार्श्वभूमी आसलेल्या उमेदवारांत वाड जाल्याचे दिसून येता.
अल्पवयीन चेडवांचेर बलात्कार, विनयभंग, बायलांचेर अत्याचार, आत्महत्येक प्रवृत्त करप, भ्रष्टाचार, चोरी, धमकी दिवप, पोलीस स्थानकाचेर हल्लो, मारहाण, फसवणूक आनी गुन्यावगारी कारस्थान, रस्तो आडोवप, बेकायदेशीर जमाव एकटाय करप, जुगार, रेल्वे आडोवप , दुसऱ्याचो जीव धोक्यात घालप, आंदोलन करप, कोविड नियमांचे उल्लंघन करप अशा जायत्या गुन्यावांत न्यायालयात आरोपपत्र दखल जावंन खटले सुरू झाल्यात वो पोलीस स्थानकांनी गुन्याव नोंद आसात, अशी माहिती 80 उमेदवारांनी आपापल्या प्रतिज्ञापत्रातल्यान सादर केल्या.