अ. भा. मराठी साहित्य संमेलनांत साहित्यीक दामोदर मावजो हांचे प्रतिपादन

उदगीरः साहित्य प्रफुल्लींत दवरपाचें आसत जाल्यार अभिव्यक्ती स्वातंत्र्य अबाधीत दवरपाक जाय. पूण जेन्ना सत्तेक माज चडटा तेन्ना ती निर्बंध घालतात. एकाधिकारशाय घटमूट करतना फॅसिझमाक सारें मेळटां. अशा वेळार साहित्यकार हात बांदून शांत बसपाक शकतात व्हय? सत्ते मुखार दिमी मारपी आमचे कडेन चड जाण आसात. तांची प्रतिभा अशा वेळार कितें करता खबर ना. साहित्यिकां मदीं सत्तेत येता तांचे खातीर चिअर करपी चिअर लिडर्स तयार जाल्यात, ही दुर्दैवाची गजाल आसा, अशी खंत ज्ञानपीठ जैतिवंत कादंबरीकार दामोदर मावजो हांणी उक्तायली. विद्रोही, बंडखोर लेखक तयार जावप गरजेचें, अशेंय तांणी म्हणलें.
अखील भारतीय मराठी साहित्य संमेलनांत मुखेल सोयरे ह्या नात्यान ते उलयताले. लातूरच्या उदगीर नगरींत 95 व्या अखील भारतीय मराठी साहित्य संमेलनाक सुरवात जाल्या. छत्रपती शाहू म्हाराज सभाघरांत आनी डॉ. ना. य. डोळे माचयेर राष्ट्रवादी काँग्रेसचे मुखेली शरद पवार हांचे हस्तुकीं सकाळीं साहित्य संमेलनाचें उक्तावण जालें. उक्तावणा पयलीं सकाळीं 8 वरांचेर छत्रपती शिवाजी चौकांतल्यान ग्रंथदिंडी काडली. मुखेल सोयरे म्हूण कादंबरीकार दामोदर मावजो हाजीर आशिल्ले. ह्या वेळार तांणी परखड मत मांडलें.
अभिव्यक्ती स्वातंत्र्याचो आनी ‘दिल्ली रायट्स 2020ः द अनटोल्ड स्टोरी’ ह्या पुस्तका वयली बंदी आनी काश्मीर फायल्स चित्रपटाचो मुद्दो तांणी मांडलो. पुस्तका वयली बंदी योग्य आशिल्ली? काश्मीर फायल्स चित्रपटांत एके वटेनचें चित्रण दाखयला, कांय गजाली अर्द सत्य आसात अशें कांय जाणांचे म्हणणें आसून ताचे वयल्यान वाद सुरू आसा. आपल्या एका इश्टाचें पुस्तक लासले. जर तुमकां एकादे पुस्तक पसंत ना जाल्यार लासून उडोवप हे योग्य न्हय. ताचेर स्पश्टीकरण दिवपा खातीर, दुसरी बाजू मांडपी पुस्तक बरोवचें, अशें मावजो हांणी म्हणलें.

… जाल्यार चवथो स्तंभ कोसळपाक वेळ लागचो नाः पवार
मतप्रचार (प्रोपागंडा) साहित्य निर्मणेक लागून निरंकुशतेक निमंत्रण मेळटा. आपल्या देशांत असोच विशिश्ट प्रोपागंडा पद्दतशीरपणान पातळायतात, अशें शरद पवार हांणी सांगलें. राजकर्त्यांनी हे खातीर साहित्य आनी माध्यमांचो नियाळ घेतला. प्रसारमाध्यमां विशीं हुशारेन कॉर्पोरेट जगाची मजत घेतल्या. चित्रपट क्षेत्रातूय ताचो प्रसार जाला. ह्याच कॉर्पोरेटाचो प्रयोग आतां साहित्यांत जाता. लुकसाणांत आशिल्ली प्रकाशन संस्था तांणी ताब्यांत घेतल्यात. हे अशेंच सुरू उरल्यार चवथो खांबो कोळसपाक वेळ लागचो ना. हे टाळपाचे आसत जाल्यार साहित्यिकांनी दोळ्यांत तेल घालून सादूर रावचे पडटले, अशें शरद पवार हांणी म्हणलें.